13. paremo'o le sidydatni po'e la alis.

paremo'o ckupau

le sidydatni po'e la alis.

i lu mi zvati sei la alis krixa li'u i abu ze'i tolmorji le nu lo mokau barda cu se banro ze'a le puzi mentu be li so'u i abu tai sutra plipe ja'e le nu falgau le pairkamni tsina sepi'o le skaci korbi gi'e renro ro le pairkamnycmi lei stedu be le cnita premei i lei pairkamnycmi cu kalsa preja i la'e di'u morjygau la alis le nu abu se snuti le nu falgau lo slofi'e tanxe ca le purlamjeftu

i lu u'u i e'osai ko mi fraxu sei abu dunku tonga ki'asku li'u i abu co'a crepu lei pairkamnycmi le loldi rai le ka sutra kei ki'u le nu le slofi'e snuti za'o se canlu le abu menli i abu tolsatci cu te sidbo fi le du'u ga eikau crepu gi'e punji py le pairkamni tsina gi py ba mrogau

i lu le nunpai na ka'e di'a fasnu sei le noltrunau cu junri mutce voksa cusku pu le nu ro le pairkamnycmi cu xruti le drani selzva i ba'e ro sei ny rere'u basna mutce cusku li'u i ny catlu la alis ca le nu cusku

i la alis catlu le pairkamni tsina gi'e viska le nu abu pu punji seja'e le nu sutra kei le rebyrespa ja'e le nu le ry stedu cu cnita i le se kecti cu sligau le rebla ta'i lo nu tolgei kei gi'e ka'enaisai muvdu i abu ry bargau gi'e drani punji i lu na mutce le ka vajni sei abu sezysku i pe'i le fatne le se fatne cu dunli le ka prali le nunpai li'u

i ca le nu ge le pairkamni cu ba'oru'e xruti fi le jenca po'u le nu se dicra gi le tanbo e le pinsi cu se tolcirko gi'e se dunda fi py kei py co'a tolylazni ciska lo lisri be le fasnu i go'i fa ropy po'u na'e bo le rebyrespa noi simlu le ka dukse le ka se sfasa kei le nu zukte lo drata be le nu kalri moklu zutse gi'e gapru catlu le drudi be le kumfa

i lu do ma djuno le cuntu sei le noltrunau fi la alis cusku li'u

i lu noda sei la alis cusku li'u

i lu xu nosai da sei le noltrunau cu za'o co'e li'u

i lu nosai da sei la alis cu cusku li'u

i lu la'e di'u cu mutce le ka vajni sei le noltrunau fa'a le pairkamni cu cusku li'u i py co'a ciska di'u le tanbo ca le nu le blabi ractu cu zunti i lu li'a zo tolvajni cu se skudji do doi nolba'i sei ry sinma mutce tonga cusku li'u i ku'i ry frumu gi'e flira snigau ca le nu tavla

i lu li'a mi skudji zo tolvajni sei le noltrunau cu sutra cusku li'u i ny ca'o tolylau sezycusku lu vajni i tolvajni i tolvajni i vajni li'u tai le nu troci le nu le mo valsi cu xagmau fi le ka sance

i so'o le pairkamnycmi cu ciska zo vajni i so'o py zo tolvajni i la alis ka'e viska ki'u le nu jibni banzu le nu catlu lei py tanbo i lu ku'i nasai vajni sei abu pensi sezysku li'u

i caku le noltrunau noi pu ze'a zukte ciska le ny notci cukta cu cusku lu ei smaji li'u gi'e bacru tcidu fi cy fe lu le voremoi javni zo'u ei ro prenu poi galtu minli li za'upa cu cliva le kumfa li'u

i roda catlu la alis

i lu mi na galtu minli li pa sei la alis cusku li'u

i lu do go'i sei le noltrunau cu cusku li'u

i lu go'i li ji'ire sei le noltruni'u cu jmina li'u

i lu iseju ainai mi cliva sei la alis cuski iji'a jy na fadni javni i do jy cazi finti li'u

i lu jy tolcitrai lei javni pe le cukta sei le noltrunau cu cusku li'u

i lu va'o la'e di'u jy pamoi ei sei la alis cusku li'u

i le noltrunau cu labybi'o gi'e sutra polje le notci cukta i lu ko pensi le do se paijdi sei le noltrunau fi le pairkamni cu dizlo je desku voksa cusku li'u

i lu lo drata velji'i cu za'o ba se jarco pe'u doi nolba'i sei le blabi ractu noi sutra plipe cu cusku i le vi pelji puzi se cpacu li'u

i lu ma se ciska fi ta sei le noltruni'u cu cusku li'u

i lu mi ti za'o na kargau sei le blabi ractu cu cusku i ku'i ti simlu le ka xatra fi le pinfu fe y da li'u

i lu ju'o go'i sei le noltrunau cu cusku ijonai ti xatra noda i ku'i ka'u le nu xatra noda cu rirci li'u

i lu ma se judri sei pa le pairkamnycmi cu cusku li'u

i lu nasai se judri sei le blabi ractu cu cusku i je'u no da se ciska fi le bartu li'u i ry tolplo le pelji ca le nu tavla gi'e jmina lu pa'e ti na xatra i ti penpau selcmi li'u

i lu xu le ciska tarmi cu me le pinfu moi sei lo drata pairkamnycmi cu te preti li'u

i lu na go'i sei le blabi ractu cu cusku i la'e di'u cu traji le ka cizra li'u i to ro le pairkamnycmi cu simlu le ka se cfipu toi

i lu ja'o py fukygau fi le ciska tarmi pe lo drata sei le noltrunau cu cusku li'u i to ro le pairkamnycmi cu xruti le ka cikygei toi

i lu pe'u doi nolba'i sei le nolse'u cu cusku mi tu na ciska i ji'a no da ka'e je'urja'o le du'u mi ja'a go'i i no cmene cu zvati le fanmo be tu li'u

i lu va'o le nu do na ciska le do cmene kei sei le noltrunau cu cusku le cuntu cu xlaze'a i ba'e ju'o do zukte fi le nu palci inaja do ne tai lo stace pu ciska le do cmene li'u

i kampu fa le nu xanvruzau la'e di'u noi cabdei pamoi lei tolbebna selsku be le noltrunau

i lu la'e di'u cu jetyja'o le du'u ta zerzu'e sei le noltruni'o cu cusku li'u

i lu la'e di'u cu jetyja'o noda poi simsa sei la alis cusku i ua do na djuno ji'asai le du'u makau se ciska li'u

i lu ko tcidu sei le noltrunau li'u

i le blabi ractu co'a dasni le vistci i lu ei mi go'i co'a ma pe'u doi nolba'i sei ry retysku li'u

i lu co'a le cfafanmo sei le noltrunau cu junri cusku ko ca'o go'i co'u le tolcfafanmo icaku ko sisti li'u

i di'e penmi co se tcidu le blabi ractu

i ti'e do ta klama ca'a i do ti tavla mi i cu'u ta ge mi preza'a ginai mi limna di

i mi pu nalkla i vlabe'i to mi'o djuno toi i ganai lanli le selte'i gi ma do dimna oi

i mi pa de i re di ko'e i do su'o ci da i do se xruti ro le co'e noi me mi moi pu za

i lu la'e di'u cu vajrai lei datni poi se tirna ca le cabdei sei le noltrunau noi xance simymosra cu cusku i seki'ubo ei le pairkanmi li'o li'u

i lu va'o le nu py ka'e ciksi di'u kei sei la alis cusku to abu cu banro lo tai barda ze'a le puzi mentu be li so'u ja'e le nu abu nasai terpa le nu zunti ny toi mi dunda lo rupnu py i ba'e mi na jinvi le du'u lo selci ji'asai di'u smuni li'u

i ro le pairkamnycmi cu ciska fi le tanbo fe lu ba'e ta na jinvi le du'u lo selci ji'asai di'u smuni li'u gi'enai ku'i troci le nu ciksi le pelji

i lu le nu noda smuni la'e di'u sei le noltrunau cu cusku cu fanta lo barda raktu ki'u le nu einai mi'a troci le nu facki lo smuni i ku'i ju'ocu'i sei ny noi ke'a lei penpau cu pejgau le cidni gi'e catlu sepi'o pa kanla di'a co'e i pe'i mi viska lo smuni i lu nai mi limna di li'u i ju'i do'u je'upei do ka'enai limna di sei ny fa'a le nolse'u cu jmina li'u

i le nolse'u cu badri daskygau le stedu i lu xu mi simlu le ka ka'e go'i sei ny cusku li'u to ju'osai ny noi marji lo jarple na simlu toi

i lu i'e sei le noltrunau cu cusku li'u i ny di'a tolylau bacru lei penpau i lu lu to mi'o djuno toi li'u mapti li'a le pairkamni i lu i mi pa de i re di ko'e li'u i ua ju'o la'e di'u nu ta fairgau lei rutytisna li'u

i lu ku'i se jersi lu i do se xruti ro le co'e li'u sei la alis cusku li'u

i lu ua ta zvati sei le noltrunau noi jarco lei rutytisna noi cpana le jubme cu jinga cusku i noda ka'e klimau la'e di'u i ku'i lu pu le nu ta fengu tarti li'u i do noroi fengu tarti doi dirba pe'i je'upei sei ny fi le noltruni'u cu cusku li'u

i lu noroi sei le noltruni'u cu fengu mutce cusku li'u i ny renro lo xinmo vasru le rebyrespa ca le nu tavla i to la bil uu pu de'a ciska fi le tanbo sepi'o lo degji mu'i le nu dy na mornygau i ku'i ry sutra di'a co'e sepi'o le xinmo noi carvi le ry flira ku'o ze'a le nu xy renvi toi

i lu seki'ubo lei valsi do na mapti sei le noltrunau cu cusku li'u i ny cisma catlu le sruri i morsi smaji

i lu mi pu vlakei sei le noltrunau cu jgicro tonga jmina li'u i roda cmila i lu e'i le pairkamni cu pensi le se paijdi sei le noltrunau ji'irenore'u le djedi cu cucsku li'u

i lu na go'i i na go'i sei le noltruni'u cu cusku i le se sfami'e cu pamoi i le se paijdi cu za'umoi li'u

i lu bebna je nalprije sei la alis cladu cusku i ionai oi pamoi fa le se sfami'e li'u

i lu ko ri'urgau le do tance sei le noltruni'u noi zirpu binxo cu cusku li'u

i lu ai mi na go'i sei la alis cu cusku li'u

i lu ko le stedu ta vimcu sei le noltruni'u cu voksa launrai krixa li'u i no da muvdu

i lu ma do terpa sei la alis noi ca ba'o banro le abu tcaci barda cu cusku i ga'i do na'e drata lo kardymei li'u

i caku le karda romei cu tolfarlu le vacri gi'ebabo farlu la alis i abu milxe krixa ri'a lo se xadba be le nunterpa e le nunfengu gi'e troci le nu rivbi ky kei gi'e facki le du'u abu vreta le rirxe korbi fau le stedu cu cpana le tuple be le mensi noi xendo vimcu loi morsi pezli noi ba'o farlu le abu flira lei tricu

i lu ko cikna doi dib alis sei le mensi cu cusku i ue do ze'u sipna li'u

i lu u'e mi senva lo tai cizra sei la alis cusku li'u i abu tavla le mensi ro le abu cizra selylifri poi do puzi ca'o tcidu ke'a i ca le nu mo'u go'i kei le mensi cu cinba abu gi'e cusku lu je'u ju'o cizra se senva doi dirba i ku'i ko ca bajra klama tu'a le tcati i ca'o lerci binxo li'u i la alis sa'irbi'o gi'e bajra gi'ecabo pensi to drani toi le du'u le se senva cu se manci

i ku'i le mensi cu zutse za'o le nu abu cliva kei gi'e vregau le stedu le xance gi'e catlu le nu le solri cu farlu kei gi'e pensi le cmalu no'u la alis ge'u e ro le abu se manci se lifri i le mensi ji'a co'a senva sa'enai i senva la'e di'e

i pamai my senva la alis i lei abu cmalu xance cu za'ure'u ca'o jgari le my cidni i lei abu carmi selci'i kanla cu catlu lei me my moi i my ka'e tirna le satci tonga be fi le abu voksa gi'e viska le cizra nu stedu desku noi se rinju le kerfa le nu gacri lei kanla i ca le nu my tirna gi'a simlu le ka tirna cu jmive binxo ru'usai my fa le cizra zukte pe le se senva be le my cmalu mensi

i le clani srasu cu vruvricypra bu'u lei my jamfu ca le nu le blabi ractu cu sutra klama i le terpa smacu cu jacre'o pagre le jibni la'ucma i my tirna le sance be lei tcati kabri ca le nu le cibmoimasti cicyractu cu kansa lei cycy pendo le ze'e nu sanmi i le cpina voksa be le noltruni'u cu minde lei ny malselfu'a vitke le nu se catra i le xarju cifnu cu za'ure'u senci fi'o cpana le cidni be le noltroni'u ca le nu loi palta ku joi loi palne cu sruri porpi i za'ure'uku le selkrixa be le cpicinfo be'o e le vrumli pe le tanbo pinsi pe le rebyrespa ge'u ge'u e le se zunva'u be lei smacrkobaiu cu se tisna le vacri gi'e jorne le darno kaksna be le tolgeitce ke jitfa cakyrespa

i my za'o zutse to lei kanla cu ganlo toi gi'e xadba krici le du'u my zvati le selmacygu'e kei gi'eku'i djuno le du'u le nu kargau ky cu banzu le nu roda binxo le tolzdi fatci i le srasu cu vruvricypra gau le brife i le la'ucma cu se boxna gau lei jauspa i le sance be lei tcati kabri cu binxo le se lanjanbe i le cpina se krixa be le noltruni'u cu go'i le voksa be le lankurji nanla i le nunsenci be le cifnu be'o e le selkrixa be le cpicinfo be'o e ro le drata ke cizra savru cu binxo sei my djuno le mixre sance be le zukcfu cange i le se cmoni be lei zu bakni cu basti lei tilju kaksna be le jitfa cakyrespa

i romai my se xanri le nu le my cmalu mensi ca le balvi cu makcu ninmu gi'e ralte ze'a lei makcu nanca le sampu je prami risna pe le vercedra gi'e jajgau le cymy cmalu panzi gi'e gasnu le nu lei ba'e py kanla cu carmi se cinri so'i cizra lisri e ju'ocu'i ji'asai le se senva pe le puzu selmacygu'e kei gi'e kansa cinmo lei py sampu se tolgei gi'e se pluka lei py sampu se gleki gi'e morji le cymy verba nunji'e e lei selgei ke crisa djedi

FA'O